黃秋生回應人肉叉燒包分屍情節：一個人搞一家有乜可能？

1993年上映的《八仙飯店人肉叉燒包》，令黃秋生初嚐影帝滋味，今日他突然在Facebook出Post回應戲中分屍做包的劇情，更借蔡天鳳案作比喻，形容「咁多人搞一件都搞唔掂，一個人搞一家有乜可能？」，引起網民熱烈討論。

原來黃秋生出Post是為了回應在書展簽名會上收到的粉絲信，他寫道：「有個叫做菜菜嘅女仔，尋日喺書展簽名時俾咗封信俾我，寫得好有禮貌，入面問咗我幾個問題，我唔想令佢失望，即管扮下南宫夫人，回答如下：叉燒包係咪黃志恆一個人喺一晚完成嘅，睇最近單蘿蔔湯就知，咁多人搞一件都搞唔掂，一個人搞一家有乜可能？失眠同叉燒包都冇影響我，意思係喺心理層面。只有我影響電影，冇電影影響我。謝謝妳的支持」。